|
27.09.2008, 12:03
|
#551 |
Вес репутации: 27 |
Даго бен дог 1абош дац...
1. Ц1ехьа некъ бахьаш, со геннара вог1уш, Хьагвелла хьаьвзира, тоха са доцуш. Со, бердах схьалеша шовда а гина, Цунна т1е вахара, болар сихдина. Бертал а воьжна, ас и шовда шийла Мелира, 1абош сайн бохбелла кийра. Ша керчош лаьтташехь т1улгаш т1ехь махо, Сан дог 1абийра-кха шовданан даго. 2. Генахь 1аш дуккха а шераш а девлла, Вара со ц1авог1уш суо винчу эвла. Эвла чу со вулуш, хадийна аре, Сан езар 1аш яра хьоьжуш со варе. И гича, безаман йийсарехь 1ийна Сан дог г1аддахара цхьа тамашийна. Езачун даго сан г1айг1а д1амелла, 1абийра сан дог, шен йовхо а елла. 3. Езачун синхаам балийна берта, Кхечира со нана 1аш йолчу керта. Сов хаза хетарна, б1аьргех хи даьлла, Хьаьвзира сан нана вуно х1айтъаьлла. Нанна сагатдина, овгал сан деган Сатуьйсуш 1ийнера цкъа иштта де ган! Сан ненан даго, шен къинхетам ботуш, Сан дог шех 1абийра, барам а боцуш. Эххар ас сацам би дахаран хьаьттахь: «Даго бен дог 1абош ца хилла лаьттахь»... Саралжин, I974 шо
__________________
Дуьненчохь хьан меха цхаъа ца хета...  Тешаме-тешаме, эсала-эсала...© |
|
|
27.09.2008, 12:03
|
#552 |
|
Вес репутации: 27 |
ДIасакъастар
ЦIерпошт а, эххар а мохь тухуш къаьхьа, Меллаша йолало, со шеца хьош. Гинехь а, куьг ластош ахь сайна тIаьхьа, Ца хези-кх ахь аьлла тIаьххьара дош. Хьо юьтуш, дIавахар ца хилла атта, Цундела бац-кха сан синлазам туьйш… Чкъургаша рельсаш тIехь мел доккху тата Хета сайн дог деттадаларх дIауьйш. ЦIерпошт «Соьлжа-ГIала — Аштаркхне», 1982 шо
__________________
Дуьненчохь хьан меха цхаъа ца хета... Тешаме-тешаме, эсала-эсала...© |
|
|
|
27.09.2008, 12:04
|
#553 |
|
Вес репутации: 27 |
Баркалла со нохчо кхолларна, Дела!
Сица а, ц1ийца а нохчо ву со. Сан деден б1ов ю сан дозаллин эла, Эхь-бехк а, г1иллакх а цо суна ло. Синметтехь 1алашбеш къоман т1е1аткъам, Т1анк аьлла нохчоллех вуьзна со ву. Хало т1ех1оьттича, ца бо ас латкъам: Собар — сан толаман меттамотт бу. Баркалла, со нохчо кхолларна, Дела! Ахь д1а ца дайтарна нохчоллин доь. Лаьттина, лаьттар ю, лаьтта цундела Маршонан г1ап хилла сан Нохчийчоь! Хоттане, 1981 шеран февраль
__________________
Дуьненчохь хьан меха цхаъа ца хета... Тешаме-тешаме, эсала-эсала...© |
|
|
|
27.09.2008, 12:05
|
#554 |
|
Вес репутации: 27 |
Боллан дитте
Боллан диттан лайно къеждо генаш, Даг т1е туьйсуш йовхо йоцу г1енаш. Генийн кийрахь б1аьста идда мутта, Моьттур дац хьо лекъна хир ду гуттар! Лаьтта бухахь боллан къона орам Меттах ца хьов, хилча санна хорам. Б1аьста малхе кхийдаш хилла бохь а Х1инца г1ийла кхозу лаьтта охьа. Йицйи-те ахь, балл, хьайн къона зама, Хала ду хьуна шело эшон 1ама? Лаац хила хьо дорцана къера, Цуьнца къийсам латтабе, ма кхера! Гулдай дерриг хьайгахь хилла г1ора, Лаьттах йовхо ийзош, денбе орам. Хиларх х1ун ду хьо цкъачунна къоьжа: Маьлхан б1аьрг хьоь дегайовхонца хьоьжу — Кийча хила дег1 хьайн малхе даккха! Кийча хила б1аьста зазадаккха! Хоттане, 1978 шеран апрель
__________________
Дуьненчохь хьан меха цхаъа ца хета... Тешаме-тешаме, эсала-эсала...© |
|
|
|
28.09.2008, 12:09
|
#555 |
|
Вес репутации: 27 |
Г1орийна зезагаш...
Маьлхан б1аьрг санна и шайн кортош можа Лепадеш, техкара зезагаш байт1ехь. Мехаша г1аттийча шайн 1алаг1ожа, 1ара уьш, вовшашна т1ете1аш, бертахь. Ц1еххьана кхаьчначу шийлачу 1аьно, Кхелира зезагаш даточу тирца. Уьш денна шелдора лайн чимийн б1ано Кортош т1е беттачу эсаран кирца. Зезагийн хазалла яйра, бос байна. Азделла сов г1ийла уьш суна дайра. Уьш марг1ал дуьйлира, шело ца лайна. И сурт гуш б1аьрхиш а сан меттаххьайра. Со сихха кхийтира хиллачух т1аккха: Зезагийн г1орийна мутт лекъна хилла. Хетара уьш г1ерта сайга бехк баккха, Гича уьш лаьтта т1е д1адуьйшуш г1ийла. Доккха луо диллира цул т1аьхьа лаьтта, Деэшна зезагий къайла а дохуш… Уьш дагалоьцуш со х1инца а лаьтта, Къинхетам синпхенех сайн чекх а бохуш.. Саралжин, I974 шо
__________________
Дуьненчохь хьан меха цхаъа ца хета... Тешаме-тешаме, эсала-эсала...© |
|
|
|
28.09.2008, 12:10
|
#556 |
|
Вес репутации: 27 |
Дахаран кеп
Дахаран сан денойх кхин цхьаъ а дIа юьстах дели. Атталла, чемхалг а цхьанна а со декхар вац. Гарехь, со хала а, атта а кханенга вели. Цкъачунна хиндолчух дог дилла сан бахьна дац. Къиношна дуьхьал со даим а деш ву сайн товба. ЙоI-бIаьрган са санна, лардо ас сайн къоман сий. Ас шалха дош аьлча, гIелло сан доттагIийн тоба. Ас иллехь Бакъ ийдеш, озало сан мостагIий. Хьараме текхайо шайн оьмарш цхьаболчу наха, Сигаьркийн кIуьралахь хестаеш къаьркъанан кеп. Даймехкан лай хилла везаш ву къонаха ваха. Иштта ю турпалчу дахаран бакъйолу кеп. Талдысай, 1982 шеран июль
__________________
Дуьненчохь хьан меха цхаъа ца хета... Тешаме-тешаме, эсала-эсала...© |
|
|
|
28.09.2008, 12:12
|
#557 |
|
Вес репутации: 27 |
* * *
Кхерстанчах дIатесна шен можа мохк, Четара гIаш Iенош, дIайоьду гуьйре. Вайшиннан безамах хьаьрчина дохк, Шелъелла марзонаш ца йоьрзу уьйре. Сайн аьтто мел бели хьан бIаьрхи ган, Варий со-м месашлахь тIекхеташ кIайн чо. Сан дагна Iеткъахь а Iодикъяр хьан, ГIайгIанах ца йоьтти хьан ойла сайнчо. Ца хаьа, муьлха ду вайшиннах харц, Хуушехь гIалатло хьаьнгара яьлла. Я хьалхалерраниг вайший а дац? Цундела ши кхоллам галморзах баьлла? Йиш хаьлла кхойкхучохь сатийсам — буо, Хьо хьайнна йиси, ткъа иштта со — сайнна… Синошна хаало къастаран хIуо, Безаман шелделла садеIар санна… Хоттане, 1981 шеран август
__________________
Дуьненчохь хьан меха цхаъа ца хета... Тешаме-тешаме, эсала-эсала...© |
|
|
|
28.09.2008, 12:15
|
#558 |
|
Вес репутации: 27 |
Сан дахар
Хаьржина ваьлла со дахаран некъ, Ленйоцу Iалашо лаьцна — Ца тоьлу стигларчу гIаргIулел лекъ, Мел хиларх и атта лаьцна…. Шал-шера къаьсташ бу сан иллин мохь УгIарехь дерачу дорцан… Лууш ву со талла кхолламан бохь, Цхьаьнгге а ца доьхуш орца… Арешна, тогIешна бетта ас букъ, Ирхенаш эшаян Iемаш, — Хала ду тIаьхь-тIаьхьа мел доккху дукъ, Дазделла сан иллин тIемаш… IаьнтIехь ас чилла лов, ткъа аьхка — тов, ХIетте а ца лаьа тиекъа… Емалдо шахьарийн урамийн зов Татано ас бечу некъан. Тийналла йохош ду сан гIулчийн дур, Дегадеш хIаваан пиллиг. Букъ тIехьа буьтуш сайн эшамийн мур, Некъ барехь дуьллу ас бIиллиг… Хууш ву, сайн болар ас даккхахь гал, Там бу кху тIулгаш тIехь вожа. Цундела ца йо ас Iалашо мал — Лепа и, малх санна, можа… Кхета со, каглахь сан кхолламан таж, Лам соьга хьожур бу гома. Делахь а, теша со: и бац сан кхаж! Дала со кхоьллина тIома! Цхьаммо цкъа керстйича сан некъан лар, Ас дина гIалаташ лоьхуш, Сан некъан жамI дийр ду сан къомо лар, ДоIанехь со Деле воьхуш… Мила ву Iалашо ца лехнарг цкъа, Хотталахь бертал а оьгуш? Ца гIатта ца лиънарг мила ву, ткъа, Гор воьжна Iуьллучух хьоьгуш? Ас лоьцу сайн некъан халонан лаг, Хьуьнарца сайн дегI а дулуш. Со хьанна хетар ву дуьненчохь стаг, Вацахь сайн ницкъах бIобулуш? Сан сийдеш гIаьттина сан некъан чан Хьестало, белшаш тIе хуьйшуш. Ас кIадо ца йо-кха сайн болар дан, ГIулчашца чаккхармаш Iуьйшуш… Дахаран некъ бо ас, ирбина бIаьрг. Хуьлда сан Iалашо гIоза! ДIо хьалха хир-кха цхьа билгало, хьаьрк — Сан некъан чаккхенан доза… Хоттане, 1982 шеран апрель
__________________
Дуьненчохь хьан меха цхаъа ца хета... Тешаме-тешаме, эсала-эсала...© |
|
|
|
29.09.2008, 14:14
|
#559 |
|
Вес репутации: 27 |
Цхьана йоIе
Ала, йоI, айхьа хIун езаш Кхолийна хьайн тийна бIаьргаш? Карор ду нур-дашо Iежаш, Хьо елахь сатесна цаьрга. Ахь дехахь седарчий сирла, Беттан дин хаьхккина йоргIа, ГIур ву со Iуьйкъе а хилла, Хьуна ян седарчийн хорха. Ловр бу ас муьлхха а бала, Хьан дуьхьа гIулч йоккхуш хIора. Ахь алахь соь: «Генавала!», Меттаххьан тоьар дац гIора. Хоттане, I976 шо
__________________
Дуьненчохь хьан меха цхаъа ца хета... Тешаме-тешаме, эсала-эсала...© |
|
|
|
29.09.2008, 14:14
|
#560 |
|
Вес репутации: 27 |
Сан некъ..
Сан некъ — хьо бу суна, теша, Г1улч иръен аьлха. Ахь кхоьхьу сан ирсан беша Азанаш маьлхан… Сан некъ, хьоь сатуьйсуш даим Анасиз лаьтта — Стигалх д1а ца оьйтуш дай и-м Вайн къинойн латта… Сан некъ, ахь гаре сатуьйсу Хьайн ваша — дог1а… 1аьржачу мархаша луьйсу Г1арг1улийн мог1а… Луьсту ахь гарш, новкъадахарш, Ойланаш ячош, Гергарчийн 1ожаллеш, дахарш, Безамаш, ачош… Сан когех хьожа а йохуш, К1амво ахь кхерста. Ойланаш сан акха йохуш, Хьо керта леста. Хетало хьан галцаш наггахь: Цкъа — вон, цкъа — дика. Хьайна сан г1улч-болар магахь, Абде со вига… Сан дегайовхонаш лаьтта Д1о х1уьц1ий-ч1уьч1ехь… Бижахьа, сан некъ хьо, лаьтта — Сан кхиэлан куьцехь… Хьайн кераюккъе со виллий, Хьуо суна хьиеха… Сих-сиха олуш сайн илли, Со хьоьца веха… Хоттане, 1982 шеран март
__________________
Дуьненчохь хьан меха цхаъа ца хета... Тешаме-тешаме, эсала-эсала...© |
|
|
